20 d' abiento

Chornada de revindicación de os dreitos nacionals de Aragón.
A oposición de o Chusticia de Aragón Chuan de Lanuza a la invasión de l' exercito forano de Felipe II en 1591 le costó a vida. Güei contina estando a mesma enrestida, a colocación de o siñal español en a Plaza de Aragón de Zaragoza, dezaga de a foyeta de o monumento a o Chusticia de Aragón , representa, encara un desprecio a la identidat aragonesa. Tanimientres muitas aragonesas encara remeran ixa calendata crucial en a historia de Aragón, como un diya ta no ixuplidar, una chornada de revindicación y de protesta.
Ista anyada tamién se fación actos en Zaragoza por iste motivo, de maitins una manifestación contra la bandiera española recorrió as carreras de o centro de a ciudat, amenizada por donzainers y dentre chilos de "espanyola au d' astí!".
De meyodiyas yera convocada una chenta vechetariana a cargo de fendo orella, programa de raso en aragonés que se emite toz os miercols en radio Topo. De nueis un concierto, parau por l'asociación A Enrestida, con o lema "dengún trango ta zaga", arrocló a bellas collas de a escena aragonesa como Los olvidados de la Morgue, Los Draps, Magnetophones, y Eina plegaus dende Catalunya.
No ixuplidar a concentración que bi abió de tardes en refirme de o diario Egunkaria, an que se chuntón bellas 150 personas.
A la fin una chornada que fa onra ta que contine viva a memoria, que a la fin ye uno de os alacez ta concarar o futuro.

O primer nevazo

Dimpués de aber estau nevando por tot arreu a la fin a nieu ha plegau en a val. Malas que me he devantau he alufrau bels 5 centimetros de polida nieu blanca. Enca que de aquí a bellas horas, cuan pille l' auto, no me cuacará tanto veyer-la.
Muitos puertos cal puyar-los con estrinques en os ruellos, Belate , por exemplo, o puerto de camín enta Iruñea, ye ubierto pero se circula con precaución, y cuatro más, dos e Bizkaia, uno en Gipuzkoa y atro en Nafarroa son trancaus por a cantidat de nieu cayida.
Asperemos sía una chornada sin accidens y os ninos puedan disfrutar de o tresoro blanco.

Casualidat

Siempre te trobas casualidaz en iste mundo, chen conoixida dillá de a tuya tierra, u chen que conoix a atros que tú conoixes, pero güei ha estau diferen, me he trobau con un siñor que sabeba bellas palabras en aragonés, porque eba estau bibindo en A Galliguera, en Ayerbe. Me ha dito: "charra-me en aragonés, mesache". Ye esclatero que me ha puesto a emozión: "¡Coño pero sabes aragonés!" le he preguntau. No' n sabeba guaire, pero sí muito más que no muitos aragoneses/as, a lo menos le cuacaba y se i eba intresau, que no'n ye poco.
Continará...

FOTOS DE L' AGÜERRO

FOTOS DE A FERIA

ELIZONDOKO FERIAK

De nuebas torno a charrar de a tierra que me aculle en istos intes de a mía bida. Güe se zelebra a feria de Elizondo, un fita que arrocla arrienda de puestos en tot o lugar, y mientres dos diyas plenará de bida y chen as carreras de o lugar.
Puestos de artesanía, birolla, ropa, asoziazions de a bal como Elizondoko Gaztetxea, ikastola Baztan, que ye publica, mais y pais contra la droga y mesmo maquinaria agricola y bestiar... serán mesos ta que a chen de Baztan, y muitos atros foranos se i amanen a fer una golladeta y alparziar u mesmo mercar, ye esclatero.
Me ha trucau o ficazio un puesto an que i eba un ombre que bendeba allos, olibas y zeite de ¡¡¡L'Almunia!!! y me he meso a charrar con él, detalles que en atro puesto no i pararías cuenta y que cuan yes difuera de casa tuya te fan goi.
Más tadebán meteré bella foto que he puesto fer iste maitín, y que de segurás tos cuacarán asabelo.

ARAGÓN TRILINGÜE

Esforigando por o rete me he trobau con istos bidios mui buenos en o blog de Purnas, prou esclaridors de a reyalidat que se bibe en Aragón. De aquí a poco nos trobaremos con un monumento feito en oro de o nuestro quiesto Chusé Ánchel (Biel, ye de dar) en a Plaza de o Pilar, ya ta queda menos Chusé Ánchel ta estar a l' altaria de Kim Jong Il...
Prou, Stop caziques...

http://www.purnas.com/2009/10/18/los-otros-oregon-television/

L' ARAGONÉS EN O NAFARROA OINEZ.

Por segundo año consecutibo l' aragonés torna a colaborar con o Nafarroa Oinez, a fiesta de as ikastolas de Nabarra, a primer bez con l' actuzión de Prau en Biana (fa dos añadas) y a presentazión que se fazió en a escuela d' aragonés Nogará de iste Nafarroa Oinez 2009. Estiaño se feba en a Sakana, una polida bal que aculle a barios lugars: Altsasu, Etxarri Aranatz, Arbizu, Lakuntza, Iturmendi...Como yera de asperar a rispuesta popular estió exemplar, zerca de 100000 personas se i amanón ta refirmar.
D' atra man se notaba a sabor aragonesa con a partizipazión de representans de l' asoziazión Nogará en os actos publicos y as actuazions de os donzainers Profés Prou en un pasabillas que recorreba as arias 1 a 3 rematando en ista, y a colla Mallacán que tamién tañón en l' aria 3. Se metaba fin a o Nafarroa Oinez con a lectura de o manifisteo en fabor de as luengas minorizadas "Txikiak handi", "Chicoz pero grans", an que tamién estió presén Dabi Lahiguera, que leyó lo manifiesto, representando a la luenga aragonesa. Tamién estión presén luengas europeas igual como Galés, Bretón, Oczitano, Catalán, Euskera...
De remarcar ye a buena acullida que se fazió a toda la chen aragonesa que i estiemos, y a gran faina de espardidura de a luenga aragonesa enta toda la chen euskalduna, y representans de atras luengas europeas, que no sabeban de a esistenzia de a nuestra quiesta fabla. ¿Nos beyemos l' añada benién? Yo creigo que sí...
(continará)

Ye gran saber-se chicot...

Istos Pilars los he bibiu de traza diferén a la resta, enca que he puesto fer as mesmas cosas que feba a ormino. No han mancau os pasabillas con Profés Prou, sí, sí en plural... os conziertos: ista añada me decanté por ir-me-ne enta' l de Chicharrica, colla mitica zaragozana de punk-rock, y prou que sí as chentas, familiar y con toz os amigos, unos de os millors intes de istas fiestas. Bueno encara que siñor Belloch prebe de zizar y meter barraches a las fiestas populars emos contrimostrau que se puede y de feito se ban fendo año par d' atro con gran esito. Allora nos queda asperar un año más ta esfrutar de atras fiestas como las de iste año.
Nos beyemos en o Nafarroa Oinez... pasabillas de Profés Prou y conzierto de Mallacán, tien buena pinta.

BISITA

Iste cabo se semana he teniu una agradable bisita de os compis, no sin antes aber estau treballando jejejej (bueno si se le puet dezir asinas) en una chornada que paraban con motibo de o diya de a chobentut amán de Bilbo. A berdat que chugar a herri kirolak, fer pasabillas y zorriar no se le puet dezir treballar.
O domingo, por contra si tocaba treballar de maitins, y astí sin cuasi dormir, no por a borina sino por os ronquius de beluno/a... me' n fue con l' auto.
De tardes i binió a chobenalla ta casa mía, faziemos una cursa por o lugar (Elizondo) y estiemos beyendo os bars autoctonos. O lunes beyemos Amaiur, a foto que tos i meto (ye feita dende o monolito que ye en un mon) y un poliu putzu (poza) que bi ha amán de Elizondo. Estiemos fendo una gambada por as espelungas de Zugarramurdi y beyendo Hondarribi, l' antigo puerto nabarro, un lugar prou majo, con unas casas de más de dos sieglos, a orillas de o Cantabrico.
O resumen de a bisita, que aspero que a lo menos os que i estiez tos fese goyo de beyer a bal y os paisaches de amán.
Un pochon, nos beyemos en Pilars.

BIACHE

Bueno iste pasau cabo de semana, pertocaba ir ta Pontebedra, una polida ziudat, que asperaba poder bisitar, enca que estase meya oreta, pero os quefers de o treballo no me dixón ni an beyer o casco biello. Bueno que le imos a fer, a lo menos dende o bus podié fer una güellada a os polius paisaches galegos. Una cosa que me trucó lo ficazio estió as casas de a zona yeran igual como as de Bretaña y muitos puestos de Escozia... teneban a chaminera en costau, de traza rectangular y con bels dos u tres tubos de salida de fumos, intresán.
O biache estió mui duro, diez oras más o tiempo d' as aturadas... una pasada, l' esquinazo a la fin se me esmicazaba por toz os costaus. Malas que pleguemos, nos bagó de fer una gambadeta ta soltar as garras, unos estiramientos, y a zenar, allora escomenzipiaba o treballo.
Aspero que en beniens zitas de ista mena, me bague de mirar-me un poquet o puesto... y meter bella foto en o blog...asperemos, asperemos...
Tos meto una imachen de as casas de Breizh (Bretaña), con bella chaminera que se i alufra. De Pontebedra no'n tiengo de fotos....what a pitty!

AINHOA

L' atro diya estió a familia de bisita por ista polida bal de Baztan, y de paso nos ne fuemos a beyer un poquet dillá, nos ne fuemos enta Ainhoa, un poliu lugarón a l ' altro costau de a güega fictizia, porque tanto l' idioma, como os costumbres, os edifizios y a cultura son iguals como en en os lugars bezins.
Ainhoa, a o sur de Lapurdi, ye prou chicorrón, pero ye majismo de tot, mui turistico, enca que sin plegar a ixos limites de a costa de a Mar Mediterrania. (Os cafés que i meten no' n son tanto. ) As casas bien aliniadas en una unica abenida, con as fustas bien acotraziadas, y plenas de flors en as fronteras y finestras dan una imachen bien raixosa a o lugar.
O fosal de Ainhoa, a o canto d' a ilesia se asozia a l' arte funerario basco, con una ripa de estelas discoidals (lapidas feitas en piedra, c on esferéns motibos y simbolos, como o lauburu, u religada en aragonés) y atros monumentos estandarizaus de granito pulito de as añadas 60-70.
A' l canto Ainhoa ye o mon Larrun, mon mitico, as espelungas de Sara, Urdazubi Zugarramurdi, a bezina Ezpeleta, famosa por os suyos pimientos.

A DENTRADA

Buen diya, güei plego de dispertar-me y me he dito... imos a creyar un blog, atamás de a mía nulidat con l' ordinador esistiba un refuse a istos ziber puestos, pero he pensau que sería una opzión do poder escribir en aragonés y fer-lo serbir. Allora aspero que de aquí entadebán baiga escribindo-ie a sobén.
Tos foi bienplegaus ta o mío cado: Os repuis