FITAS PIRINENCAS

Fa bells anyos a fusta que se tallaba en as vals de o Perineu yera baixada y carriada dende alto por os rios convertida en nabata enta las ciudatz de o llano ta vender-la, una traza de aprofitamiento de os recursos naturals y una economia de supervivencia de as vals pirinencas (Echo, Roncal, Aezkoa, Galliguera...)
Baixada de nabatas dende Echo lo diya 9 de mayo dende as 13 horadas por o rio Aragón Subordan, con un recorriu de altubaixo 3 kilometros que se encetará en Lo Pozo de lo Molino y rematará en Lo Puent Viello. De a mesma traza iste cabo de semana os vecins de la Val de Roncal tirón ta o río Esca as suyas almadias, una fita prou vistera que arrocla a milenta de personas ta veyer como baixan os camals feitos balsa por o río.
L'asociacion de nabateros d'a Galliguera ya fació fa bell.as dos semanas a suya huitena baixada por o rio Galligo dende Morillo de Galligo dica o puent de Santolaria, una baixada un poquet mas embolicada que no atras vegadas, por un caudal muit baixo, pero que a la fin salio como se asperaba. A nabata contaba con hueito tripulants, siet de a Galliguera y un de Echo.
De fitas en charramos, iste cabo de semana en a Val de Baztan (Nafarroa) se feba una trobada arredol de un instrumento pirinenco: o salterio u chicoten (en Aragón) u ttun ttun como se diz en Navarra. Un instrumento que consta de una caixa de fusta con cuerdas, que se percuten en tocar-las con un palo, dando un ritmo mientres con l'altra man se tanye o chiflo. Evento que i trayó a chent (mosicos y danzantes) de Bearn, Navarra y Aragón. O viernes de tardes, charrada sobre a historia de iste instrumento, y mientres sabado y domingo se fación bells pasabillas en puestos sinyalers como Arizkun u Elizondo.